ეროვნული სასახლე

ეროვნული სასახლე

ქალაქ თბილისის მუნიციპალიტეტის მერიის ა(ა)იპ „მოსწავლე-ახალგაზრდობის ეროვნული სასახლე“ საქართველოს უდიდესი კულტურულ-საგანმანათლებლო ცენტრია. ეროვნული სასახლე, თანამედროვე საერთაშორისო პრაქტიკის გათვალისწინებით, ახალგაზრდებს თავისუფალ და არაფორმალურ გარემოში, მრავალფეროვან საგანმანათლებლო და შემოქმედებით სერვისებს სთავაზობს, რაც მომსახურების მაღალ სტანდარტს ეფუძნება.

სასახლეში ტრადიციულად, ყოველწლიურად 5000-მდე ახალგაზრდა არაფორმალური განათლების სხვადასხვა ფორმით და მეთოდით, სკოლისგარეშე და დამატებით განათლებას იღებს. ეროვნულ სასახლეში არსებული საგანმანათლებლო სერვისები მრავალფეროვანია და საერთაშორისოდ აღიარებულ, მდგრადი განვითარების კონკრეტულ მიზნებს ეფუძნება.

ორგანიზაციის მიზანია ახალგაზრდებში ინდივიდუალური, ესთეტიკური და შემოქმედებითი შესაძლებლობების განვითარება. სასახლეში არსებული სასწავლო-მეთოდური ცენტრის საგანმანათლებლო პროგრამები ახალგაზრდებს უვითარებს ანალიტიკური და კრიტიკული აზროვნების, გადაწყვეტილებების მიღების, პრობლემის გადაჭრის, სოციალურ, თანამშრომლობით და სისტემური აზროვნების უნარებს.

ეროვნული სასახლის წრეები, კლუბები, ფესტივალები და სხვა აქტივობები მოზარდებში ზრდის სამოქალაქო თვითშეგნებას, ხელს უწყობს თავისუფალი, შემოქმედებითი თუ სხვა უნარების განვითარებას, თვითრეალიზაციასა და სამომავლო პროფესიების შერჩევას. ეროვნული სასახლე, როგორც ახალგაზრდებისათვის მნიშვნელოვანი კულტურულ - საგანმანათლებლო ცენტრი, მიზნად ისახავს ახალ თაობას ღირსეული პარტნიორობა გაუწიოს და ამით ქალაქის კულტურულ ცხოვრებაში მნიშვნელოვანი როლი შეასრულოს.