Tbilisi Piano Fest-ის მეორე საფორტეპიანო ფესტივალი

Sep 30, 2020

29 სექტემბერს, ,,არტოს ბაღში” Tbilisi Piano Fest-ის მეორე საფორტეპიანო ფესტივალი სიმფონიური მუსიკის კონცერტით დასრულდა, რომლის სამხატვრო ხელმძღვანელი/ პროექტის ორგანიზატორი საერთაშორისო პრემიების ლაურეატი, ქართველი პიანისტი დუდანა მაზმანიშვილია.

მსმენელის წინაშე ეროვნული სიმფონიური ორკესტრი, ნიკოლოზ რაჭველის დირიჟორობით და ახალი თაობის ქართველი მუსიკოსები – გიორგი გიგაშვილი და ცოტნე ზედგინიძე წარდგნენ.

ღონისძიებას ესწრებოდნენ, დედაქალაქის მერის მოადგილე ანდრია ბასილაია, ეროვნული სასახლის დირექტორი თიკა რუხაძე, მუსიკისა და კულტურის სფეროს წარმომადგენლები.

Tbilisi Piano Fest-ის ფარგლებში ეროვნულ სასახლეში 22 სექტემბრიდან 29 სექტემბრამდე მიმდინარეობდა საფესტივალო კონცერტები, მასტერკლასები, ვირტუალური ვორქშოფები, ლექციები.

მუსიკალურ შეხვედრებში მონაწილეობდნენ: ლეგენდარული პიანისტი ციპრიენ კაცარისი, ცნობილი მუსიკოსები – ჯერომ როუზი და ჯეფრი სუონი, მასიმილიანო ფერატი და გაბრიელე ლეპორატი, ახალგაზრდა წარმატებული ქართველი მუსიკოსები – ნიკოლას ნამორაძე და მარიამ ბაწაშვილი.

საფესტივალო მასტერკლასებსა და ვორქშოფებში მონაწილე ახალგაზრდა მუსიკოსებს საპატიო პრიზები და სიგელები გადაეცათ.

საგანმანათლებლო კომპონენტის სამი საუკეთესო მონაწილე, ასევე, დააჯილდოვა კლასიკური მუსიკის ხმის ჩამწერმა ბერლინურმა ლეიბლმა – Cugate Classics. კომპანია გიორგი გიგაშვილის, ასლან ჩიქოვანისა და სანდრო გეგეჭკორის პროფესიონალურ აუდიოჩანაწერებს დაამზადებს, ხოლო გიორგი გიგაშვილს, ასევე კომპაქტ-დისკის სრულ საპროდიუსერო მხარდაჭერას გაუწევს.

ფესტივალის ოფიციალური პარტნიორია მსოფლიო ბრენდი – BECHSTEIN, რომელმაც ფესტივალის ერთ-ერთ მთავარ თანაორგანიზატორს, მოსწავლე-ახალგაზრდობის ეროვნულ სასახლეს საჩუქრად საკონცერტო როიალი გადასცა. თბილისის მერის მოადგილისა და სასახლის ხელმძღვანელის გადაწყვეტილებით, რეაბილიტაციის შემდეგ, სასახლის ერთ-ერთ სადღესასწაულო დარბაზს მიენიჭება „ბეხშტაინის“ სახელი.

Tbilisi Piano Fest -ის ოფიციალური მხარდამჭერები არიან:თბილისის მერია / Tbilisi City Hallგანათლების, მეცნიერების, კულტურისა და სპორტის სამინისტროეროვნული სასახლეGeorgian Philharmonic Orchestra / საქართველოს ეროვნული სიმფონიური ორკესტრიBechstein